Трансродовите лица (или „транс-лица“) се лица чиј родов идентитет не се совпаѓа со бинарните стандарди на општеството или чиј родов идентитет не е во согласност со биолошкиот пол (за нив често се вели дека се чувствуваат како да се родени во „погрешно тело“). Овде спаѓаат лицата што се родово неконформирани, транссексуални, крос-дресери итн. <br /><br />Родовиот идентитет е фундаментален аспект на приватниот живот, правното признавање на истиот ги прави трансродовите луѓе видливи, препознаени и прифатени во општеството. <br />Сепак, во многу земји, трансродовите лица не се во можност да добијат соодветно признавање на нивниот посакуван род, вклучувајќи промена на евидентираниот пол и име во државните документи за идентификација. Како резултат на тоа, тие се соочуваат со многу практични тешкотии, вклучително и при аплицирање за вработување, домување, банкарски кредит или државни бенефиции, или кога патуваат во странство.<br /><br />Документот насловен „Trans Rights Europe Map 2018“ објавен од невладината организација Transgender Europe упатува на податокот дека законското признавање на родовиот идентитет на трансродовите лица не е можно во седум земји членки на Советот на Европа (Албанија, Андора, Кипар, Лихтенштајн, Монако, Сан Марино и Република Македонија). Во документот, исто така, јасно е наведено дека признавањето, дури и онаму каде што е можно, е предмет на различни правни барања, како што се стерилизација, задолжителна медицинска интервенција или проценка на менталното здравје, развод или старосни ограничувања<br />Најновото истражување на Коалицијата „Маргини“, исто така, покажува дека трансродовите лица кои живеат во Македонија се изложени на психолошко или физичко насилство и често се чувствуваат загрозено и во најминорни секојдневни ситуации. Еден од најчестите проблеми што беше посочен од учесниците во истражувањево беше проблемот со личните документи и погрешното препознавање до кое води неусогласеноста на податоците за нивниот пол, со нивниот родов израз и прикажувањето во јавност. Речиси без исклучок ваквите ситуации се стресни и понижувачки за лицата, бидејќи мора континуирано да го објаснуваат својот идентитет и да ја бранат својата идентификација пред непознати службеници и непознати лица.